Páskaegg búin til í verksmiðju
Súkkulaðipáskaegg búin til í verksmiðju
Súkkulaði sprautað í mót
Bráðið súkkulaði kemur í gegnum rör og það liggur ofan í trekt við eina vél.
Þessi vél er notuð til að sprauta súkkulaði í plastform eða mót sem hvert um sig tekur nokkur páskaegg. Hér er verið að sprauta í form sem taka sex egg.
Mótin látin snúast
Súkkulaðið er ennþá bráðið í formunum og þá eru formin sett á arma á vél sem snýst bæði í hring og svo snýst hver armur líka. Þetta er til að súkkulaðið renni vel alls staðar í mótinu svo það verði engin göt eða of þunnir fletir á páskaeggjunum.
Mótin kæld niður
Þegar formin hafa snúist í nokkrar mínútur eru þau sett inn í geymslu þar sem þau eru kæld niður og þar storknar súkkulaðið til fullnustu.
Hér sést þegar eggin koma í mótunum úr kælingu og starfsmenn fylgjast vel með hvort öll egg séu heil og falleg.
Pökkun á súkkulaðimolum
Inn í páskaeggin eru sett fylling af ýmsu góðgæti, meðal annars súkkulaðimolum. Súkkulaðimolar í skrautlegum gljápappír er líka settur utan á páskaegg. Hér sést vél inn í glerbúri sem pakkar súkkulaðimolum í pappír alveg sjálfvirkt. Starfmaðurinn matar vélmennið á súkkulaðimolum.
Eggin skreytt
Það þarf mörg handtök við að skreyta páskaeggin. Inn í þau og utan á er sett sælgæti og ýmis konar dót og skraut og svo oft ungi efst á eggið.
Pökkun
Þegar eggin eru tilbúin þarf að pakka þeim í plast til að þau skemmist ekki. Hér sjást starfsmenn við pökkun og í baksýn er færibandið sem flytur eggin til þeirra.
NAMM, NAMM Nú eru eggin tilbúin og verða send í verslanir þar sem foreldrar, afar og ömmur eða aðrir vinir og vandamenn kaupa þau til að gleðja börn á öllum aldri.
Myndir teknar af SG í Nóa Síríus í Reykjavík
Kærar þakkir til Nóa Sírius fyrir að leyfa mér að taka myndir af páskaeggjaframleiðslunni.
Síðast uppfært 24. mars 1998